CEBU, Philippines - Ang mga opisyal sa dakbayan sa Lapu-Lapu maghuwat pa kun unsa ang rekomendasyon sa Maritime Industry Authority (MARINA) usa sila mohimo’g lakang kun angay ba nga tugotan nga maka-operate pagbalik ang Cebu Yellow Submarine nga aksidente’ng nakadam-ag og pumpboat.
Matud ni City Administrator Teodolo Ybañez nga human sa hitabo kaniadto’ng Hulyo 3 didto sa kadagatan sa Barangay Maribago ila dayon nga gipasuspenso sa MARINA ang operasyon sa Yellow Submarine ug gisuspenso usab sa kagamhanan sa Lapu-Lapu ang ilang business permit. Apan nakadungog si Ybañez nga gilibkas na sa MARINA ang pagsuspenso sa Yellow Submarine mao nga ilang gihuwat ang ilang rekomendasyon aron basehan kun libkason ba usab nila ang pagsuspenso sa business permit.
Matud pa nga puwede na makadagan ang Yellow Submarine apan dili usa sila maka-accommodate og mga pasahero tungod kay wa pa gilibkas ang suspension order sa business permit.
Ang Yellow Submarine gigamit sagad sa mga turista nga gusto’ng mosud-ong sa kinahiladman nga bahin sa kadagatan diha sa dakbayan sa Lapu-Lapu.
“They can still float but they can’t do business,” matud ni Ybañez
Kahinumduman nga sa miagi’ng tuig ang operasyon sa Cebu Yellow Submarine nasuspenso usab og duha ka buwan human niini gidaro ang corals sa Kontiki Wall, usa ka ilado’ng diving site sa kadagatan sa Barangay Maribago.
Ang maong aksidente nakuhaan og video sa usa ka Japanese technical diver nga si Satoshi Toyoda ug gi-upload kini sa social networking site mao nga giaksyonan dayon sa mga opisyal sa Lapu-Lapu.
Nasayran nga ang suspension nalibkas human ang operator sa Yellow Submarine mipasalig nga maoy moabaga sa bayranan sa rehabilitasyon sa nadaot nga mga gasang.
Gitugotan sa mga opisyal sa Lapu-Lapu nga maka-operate pagbalik ang Yellow Submarine ubos sa kondisyon nga adunay kawani sa City Hall ang mosakay aron maoy mag-monitor. - /RUB (BANAT NEWS)