CEBU, Philippines- Gitinguha sa kagamhanan sa dakbayan sa Mandaue nga himoong park ang matag daplin sa Butuanon River nga masuroyan sa katawhan.
Si Engr. Ricardo “Gaga” Mendoza sa Solid Waste Management Office sa dakbayan miingon nga gisugdan na ang pagdesinyo tumong sa pagpahiuli sa sapa ug pagpatahum sa matag habig niini.
Kini ang hinungdan nga gihingusgan sa kagamhanan ang paghawan sa kabalayan daplin sa sapa ug gibalhin sa 6.5 ektaryang luna nga relocation site sa barangay Paknaan.
Gipasabot ni Mendoza nga magtinabangay ang kagamhanan sa dakbayan uban sa mga magpapatigayun ug sa Department of Environment and Natural Resources-7 alang sa pagpananum og mga kahoy sa kadaplinan ug palibot sa Butuanon River.
Ang DENR mideklarar na sa 23 ka kilometro nga Butuanon River nga “water quality management area” isip lakang sa pagtabang sa pagpatuman ug pagpakiglambigit sa pagpahiuli na sa kahimtang sa maong sapa.
Si Mendoza miingon nga nalakip usab sa giplano nga himoon ang kaugmaran alang sa pagpatahum mao ang Mahiga Creek sa barangay Subangdaku. - /GMR (BANAT NEWS)