CEBU, Philippines - Nadakpan ang usa ka babayeng shoplifter gumikan sa pagsuway pagpalusot sa mga butang balor og P42 mil nga wala bayari sa usa ka dakung mall sa Ibabao Estancia, dakbayan sa Mandaue.
Ang nadakpan mao si Jenjen Rosas, 37-anyos, taga Sitio Little Tokyo, Maguikay, sa maong dakbayan.
Matud ni SPO4 Wynne Ompad, imbestigador sa Presinto 1 sa Mandaue City Police Office, nga gipamili sa suspetsado ang mahalong mga baligya nga naglakip sa branded nga mga sapot, karsones, grocery items ug uban pa. Gisulod sa suspetsado ang mga pinili nga mga baligya sa basket ug naghinay-hinay na unta sa paglakaw padulong sa gawas nga wala mohapit sa cashier.
Gipanid-an na diay sa mga house detective ang suspetsado ug daling gidakop sa mga guwardiya nga nag-atang sa pultahan sa mall. (BANAT NEWS)