Re-training sa mga polis sugdan

CEBU, Philippines - Gikatakdang sugdan karong Lunes ang Character and Attitude Development Training (CADEP) nga ipahigayon sa Cebu City Sports Center alang sa mga polis nga tambok, badlongon ug dunay mga kaso nga giatubang.

Matud ni Senior Supt. Noli Romana, direktor sa Cebu City Police Office (CCPO), nga gipaning-kamotan nila nga ilang mahatag ang tanan nga gikinahanglan nga pwedeng mahimo aron mabalik sa tarung nga dalan ang maong mga polis.

Dugang pa ni Romana nga apil sa refresher course mao ang values formation nga pangunahan og pastor ug pari nga makatabang kanila nga madugangan ang ilang kaalam sa Bibliya ug mahulma pagbalik ang ilang moral nga aspeto.

Lakip usab niini mao ang physical fitness, law enforcement ug pagpahinumdum sa mga ideya sa pagserbisyo ug pagpangalagad sa kapolisan ngadto sa katawhan.

Milaum si Romana nga sa pagpahigayon sa maong training sulod sa 30 ka adlaw makab-ot nila ang mga tumong sa pag-umol sa  kapolisan aron mahimo kining matarong nga indibidwal.

Sa nakuha nga kasayuran sa Banat News duna’y mga naapil sa maong programa nga mga polis nga nagdala sa ranggo nga SPO4 ug duna sa’y mga mas ubos pa og ranggo niini.

Gipasabot ni Romana nga daw sa duna pa’y posibleng madugang nga 20 ka polis sa maong programa apan wala niini gihinganlan kung asa kini nga buhatan maggikan.

Ang maong programa gihimo sa kapolisan sa Sugbo aron subli nga tul-iron kadtong mga polis nga badlongon, pagbalik sa saktong panglawas ug mabalik sila sa insaktong direksyon alang sa paghatag og serbisyo sa katawhan. (/GMR)(BANAT NEWS)