CEBU, Philippines - Giawhag sa Office of the Civil Defense ang mga local disaster risk reduction management council nga monitoron ang ilang tagsa-tagsa ka lugar isip pagpangandam pagsulod unya sa bagyong Florita karong adlaw'ng Domingo.
Matud ni Flor Gaviola, assistant regional director sa OCD nga mahinungdanon kaayo ang pag-monitor ilabi na sa mga kasapaan ug ang mga lugar nga delikado sa landslide aron malikay sa disgrasya.
Giawhag usab niya ang mga opisyal nga tamdan ang geo-hazard map nga gihatag kanila nga nagpakita sa mga danger zone areas sa ilang mga lugar. Kini aron mahiklin nang daan ang mga residenteng namuyo sa maong mga dapit.
Nasayran nga sa bag-ong balaod nga Republic Act 10121, kinahanglang pro-active na ang local government units aron kapugngan ang grabeng epekto sa katalagman, usa niini nga paagi mao ang subsob nga information drive. Giawhag usab ni Gaviola ang mga residente nga mag-monitor kanunay sa mga balita sa kahimtang sa tagsa-tagsa ka lugar.
Kinahanglan nga karon pa lang mga adlawa napadangat na sa local disaster teams sa ilang mga residente ang mga evacuation centers nga mahimo nilang kadangpan kun kinahanglan silang mobakwit. (/EIM)(BANAT NEWS)