CEBU, Philippines - Mitahan na sa iyang kaugalingon diha sa Camp Crame si Senador Juan Ponce Enrile human gipagawas sa Sandiganbayan Third Division kagahapon ang warrant of arrest batok kaniya human makakita og basehan aron siya kasohan tungod sa kasong plunder ug graft charges.
Lakip usab sa mitahan diha sa Sandiganbayan ang iyang kanhi chief of staff nga si Gigi Reyes. Gimando usab ang pag-aresto sa negosyanteng gibilanggo na nga si Janet Lim Napoles, Ronald John Lim ug John Raymond de Asis tungod usab sa kasong plunder, sumala pa sa Philstar.com.
Si Enrile nag-atubang og onse ka kasong graft sa Sandiganbayan. Sayo pa niini, ang First ug Fifth divisions mimando sa pag-aresto nila ni Senador Ramon Revilla Jr. ug Jinggoy Estrada tungod gihapon sa susamang kaso.
Ang maong mga senador mao pay labing una nga magbabalaod nga gikasohan tungod sa alegasyong pagbulsa sa ilang Priority Development Assistance Fund pinaagi sa mga bogus nga non-government organizations ni Napoles.
Sila si Revilla ug Estrada kasamtangang gitanggong sa Philippine National Police Custodial Center sa Camp Crame ug gikatakda unya nga magkuyog silang tulo ni Enrile sa prisohan.
Si Criminal Investigation and Detection Group (CIDG) chief Director Benjamin Magalong miingon nga magpaabot sila sa rekomendasyon sa PNP medical doctors kung makasugakod ba ang 90-anyos nga si Enrile sa iyang pangidaron sa maong prisohan. (BANAT NEWS)