CEBU, Philippines - Ang city hall consultant ug city legal officer sa dakbayan sa Talisay nagkanayon nga walay kalapasan si Mayor Johnny De los Reyes sa wala pagdeklarar niini diha sa iyang Statement of Assets, Liabilities and Net Worth (SALN) sa uban niyang mga paryente nga giingong gipatrabaho isip mga job order (JO) sa city hall.
Si Atty. Ireneo Morales kanhi direktor sa Civil Service Commission (CSC) ug karon Talisay City Hall consultant nagkanayon nga walay kalapasan ang pag-hire og job order tungod kay naandan na kining gihimo sa national ug lokal nga mga ahensiya sa gobiyerno.
Matud usab ni Morales nga ang wala pag-apil ni De los Reyes diha sa iyang SALN sa ubang mga ngalan sa iyang paryente nga nagtrabaho isip JO sa city hall walay nalapas nga balaod. Ubos sa balaod sa SALN ipadeklara sa matag kawani sa gobiyerno ang ilang mga paryente hangtud sa “fourth degree of sanguinity” o “affinity” nga nagserbisyo sa gobiyerno.
Si Morales mipasabot nga ang Section 9, Rules XIII sa 1998 Memorandum Circular No.40 sa Civil Service Commission kon “ Revised Omnibus Rules on Appointments and Other Personnel Actions” wala kini kalabutan sa wala pag-apil sa mayor sa iyang ubang mga paryente diha sa SALN.
Matud ni Morales nga ang JO base sa balaod sa CSC dili makonsidera nga kawani sa gobiyerno. Ang JO walay “employee-employer relationship” hinungdan ang mayor wala molakip sa pito niya ka mga paryente diha sa iyang SALN. Apan ang kampo ni De los Reyes wala mohatag sa mga pangalan sa nahisgutan nilang mga paryente.
Nunot niini si Talisay City Administrator John Yre De los Reyes mipadayag sa iyang kasagmuyo diin matud niya nga nasakitan siya nga ang ngalan sa iyang inahan naapil sa isyu nga dili man kini kawani sa city hall.
Matud ni Yre nga ang iyang inahan moanha sa city hall aron mag-atiman sa pagkaon ug mga tambal sa iyang amahan.
Gibutyag ni Yre nga pito lang sa ilang mga paryente ang nagtrabaho isip JO sa city hall.
Dugang ni Yre nga ang pagka-lider sa iyang inahan sa women’s organization sa siyudad boluntaryo ug walay sweldo. (BANAT NEWS)