Dugang NFA retailers gireklamo

CEBU, Philippines - Padayong gisusi sa monitoring team sa National Food Authority-7 ang nitumaw nga reklamo gikan sa mga konsumedor nga may mga retailers sa kamerkaduhan sa Sugbo ang wala magtarong sa pagpamaligya.

Sigon sa mga reklamo nga dili kanunay abli ang mga NFA retailers aron dili makabaligya og NFA rice.

Samtang ang uban mobukas apan limitahan lang og duha ka kilo ang matag usa ka konsumedor.

Namatikdan sa mga konsumedor nga ang ubang retailers nibaligya sa ilang allocation ngadto sa mga rice traders sanglit mas daku man ang ilang ganansiya kaysa sila mismo ang mobaligya niini.

 Kini ang hinungdan nga ang NFA rice mabaligya na sa laing tindahan ug laing pangan sa bugas  sa presyo nga P35 hangtud sa P38 matag kilo tungod kay ilisan na man kini og laing sako. Ang tigpamaba sa NFA-7, Ma. Lucia Rosales, nitug-an nga ang ilang buhatan mohimo gyud og lakang batok niini apan iyang gitataw nga mas mapadali ang ilang imbestigasyon kun may mga konsumedor ang moabag sa ilang buhatan.

Subling gipahinumdum ni Rosales nga langkatan gyud sa ilang accreditation ang mga retailers sa NFA nga wala motuman sa lagda sa ilang buhatan sa higayon nga masakpan kini sa mga sakop sa monitoring team sa NFA.

Nasayran nga may pito na ka mga NFA retailers sa siyudad sa Sugbo, Mandaue, Carcar ug lungsod sa Consolacion ang giwagtangan sa ilang accreditation human nasakpang wala nibutang sa karatola nga namaligya kini og NFA rice sugod niadtong bulan sa Mayo ning tuiga. (BANAT NEWS)