Notadong “tulisan” sa tersiro distrito nadakpan

CEBU, Philippines - Duha ka gipasanginlang notadong mga tulisan nasikop sa kapolisan sa Toledo City sa bukirong bahin sa lungsod sa Balamban,  armas, granada ug shabu nasakmit.

Giila nga mga responsable sa mga nahitabong pagpanulis, kawat ug krimen sa tersiro distrito ug kasikbit nga mga kalungsoran ang nahulog sa mga kamot sa kapulisan sa Toledo City Police Station human sa gipahigayong hot pursuit operation.

Ang gidakop mao sila si Eusebio alyas "Ramil" Piloto, 44, ug Hadje Dosdos 37,  pulos taga barangay Buanoy lungsod sa Balamban ang nasikop sa kapulisan sa Toledo sa gipahigayong hot pursuit operation sa barangay La Mesa bukiran nga bahin sa Balamban.

Matud ni Chief Inspector Michael Anthony Bastes, hepe sa Toledo City Police Station nga nahinabi sa Banat News nga ang maong mga dinakpan maoy responsable sa pagpanulis sa usa ka sekretarya sa usa ka gas company diin nadagit ang dili momenos sa P50 mil niadtong nakalabay’ng adlaw.

Ang maong mga suspek usab ang gidudahang responsable sa  nahitabong paglabay og granada sa lungsod sa Asturias pipila na ka tuig ang nakalabay, ingon man mga kawat, tulis ug pagpatay sa tersero distrito.

Nalutsan na usab og warrant of arrest sa kasong pagpatay ang dinakpan nga si Piloto.

Nasakmit gikan sa duha ang usa ka Armalite Rifle, silencer nga adunay extra magazine nga may walo ka buhing bala, duha ka kalibre .45 nga may magazine ug pito ka bala, usa ka granada, duha ka pakete nga medium size nga gituohang shabu ug nakuha usab ang giingong get away vehicle nga Toyota Sedan kolor grey nga adunay plate number THZ 729.

Ang hot pursuit operation gipangulohan ni Bastes kauban sa iyang mga sakop nga sila si Pol. Insp. Gilfred Baroman, SPO1 Jeffrey Matunog, SPO1 Gerardo Taboada, PO3 John Ricafort, PO3 Roxam Enerio, PO3 Melchizedek Batomalaque, PO2 Romeo Jaranilla, PO2 Geoffrey Nerz, PO1 Rogelio Gutang ug  PO1 Redan Lara.

Ang duha gipresentar ngadto kang Toledo City Mayor John Henry “Sonny” Osmeña.

Ang mayor nagpasalamat sa kapulisan sa mga suspek. (BANAT NEWS)