Rama misusi sa Ban-Tal Road

CEBU, Philippines - Gilakaw ni Mayor Michael Rama ug ubang mga opisyal sa Cebu City Hall ang pipila ka kilometro nga Banilad-Talamban Highway kagahapon sa kaadlawon aron paghimo og personal nga pakisusi sa sitwasyon sa mao nga karsada.

Daghan nga mga butang nga naglakip sa mga lamesa, lingkoranan ug uban pa nga diha gipahiluna sa aseras sa Governor Mariano Cuenco Avenue ang gipangsakmit sa mga kawani sa City Hall.

Adunay mga sakyanan nga diha gipabuntagan pag-parking sa daplin sa karsada gi-clamp sa mga sakop sa City Traffic Operations Management (CITOM).

Naobserbahan ni Mayor Rama nga ang koral ug ganghaan sa University of San Carlos (USC)-Talamban Campus nagsilbi nga usa sa “culprits” kon nakamugna og problema sa trapiko sa maong dapit.

Kini tungod kay ang mga passenger jeepney ug mga pribado nga sakyanan nga maghatod ug magkuha og mga tinun-an nga anaa magtungha sa USC mohunong man atubangan g’yud sa ganghaan sa tunghaan.

Gimando ni Mayor Rama nga destinohan og traffic enforcers ang atubangan sa tunghaan ug did-an na ang bisan unsa nga matang sa sakyanan paghunong atubangan sa USC.

Gihimo nga sanglitanan ni Mayor Rama nga sa USC Main building wala itugot nga makahunong ang sakyanan atubangan sa tunghaan mao nga imposible nga dili kini mahimo sa USC-Talamban Campus.

Si CITOM Chairman Ruben Almendras nga apil sa mga opisyal nga miuban ni Rama paghimo’g inspection sa Ban-Tal Road gimandoan sa mayor nga makighinabi sa kadagkoan sa USC aron isibog ang ilang koral sa atubangan bali’g duha ka metros.

Sa ingon nga paagi makatabang kini nga molapad ang karsada atubangan sa tunghaan nga gihulagway sa mayor nga gamay kun itandi sa ubang bahin.

Ang mayor mimando usab ni City Legal Officer Gerone Castillo nga sutaon kun aduna ba’y permit ang pagtukod sa mga   pader nga miukopar na sa aseras ug ngadto sa karsada.

Nasayran nga ang Department of Public Works and Highways (DPWH) adunay proyekto nga pagpalapad sa Banilad-Talamban Road apan gikahibudngan kun ngano nga hangtod karon wala pa kasugdi ang mao nga gimbuhaton.

 Ang mayor nagsugod paglakaw gikan sa tiilan sa flyover sa Archbishop Reyes Avenue dapit sa TESDA Building mga alas 4:30 sa kaadlawon.

Naobserbahan usab ni Mayor Rama nga angayan gayud nga isibog ang koral sa TESDA habig sa Salinas Drive kay aron kabuhatan kini og aseras sama sa atbang nga bahin sa karsada.

Ang kapilya nga nahimutang sa eskena atbang nga bahin sa Salinas Drive gusto ni Rama nga balhinon aron ang mao nga lugar nga nahimutangan sa kapilya magamit pagpalapad sa likoanan sa karsada. (BANAT NEWS)