‘Contractor’ na-entrap

CEBU, Philippines - Nasikop sa entrapment operation sa Theft and Robbery Section sa Cebu City Police Office (CCPO) ang usa ka nagpaila nga contractor nga gireklamo sa mga sub-contractors nga nakuhaan og dakung salapi.

Ang dinakpan naila nga si Resel Resma, 42, nagpuyo sa dakbayan sa Talisay ug nagpaila nga maoy tag-iya sa usa ka kompanya nga nakabase sa dakbayan sa Talisay.

Nangayo og pakitabang sa TRS ang duha ka mga engineer nga gikontrata sa suspek isip sub-contractors nga sila si Alain Villaganda ug Kawi Alenton human nakahatag na sila og ‘downpayment’ nga mokabat og P300 mil sa suspek isip bayad sa kontrata, seminar ug ‘padangog’ sa opisinang molihok sa mga papeles.

Matud pa sa hepe sa Theft and Robbery Section, Chief Inspector  Noli Cernio nga nahinabi sa Banat News nga gipasaligan sa suspetsado ang mga reklamante nga himuong  sub-contractor sa nakuha niini nga kontrata pagtukod og 50 ka mga units nga kantidad nga tag P550 mil matag usa.

Gani miisyu pa kini og tseke nga balor P75 milyones ngadto ni Villaganda isip pasiuna kunong bayad sa foreigner nga nagpahimo sa maong mga units, apan wala dawata sa bangko kay sayop ang ‘spelling’ sa apelyedo, kay inay Villaganda, “Villagonda” ang nakabutang. Tungod niini giuli kini sa reklamante ngadto sa suspek aron korihian, apan sumala pa ni Cernio, sukad niadto wala na mopakita pa ang suspek ug magtawag-tawag na lang kini sa cellphone.

Matud pa ni Cernio nga mao kini ang modus sa suspek.  Kagahapon, giingong nangayo kini pag-usab og P100 mil, diha-diha midangop na sa kapolisan ang mga biktima hinungdan sa entrapment kagahapon sa hapon sa parking area sa usa ka dakong mall sa north reclamation area. Apan ang suspek sa pakighinabi sa Banat News miinsister nga lehitimo siya nga kontraktor.  Nakuha sa kapulisan sa posisyon ni Resma ang “budol” marked money nga mokabat og “P100 mil”, mga ID’s ug cellphone, duha ka tseke nga nagkantidad og P15 mil ug ang tseke nga P75 milyones nga nagdala sa sayop nga apelyedo ni Villaganda.

Duna pay laing engineer nga namasangil nga nabiktima sa suspek samtang usa ka representante sa  hotel nga mipasangil kaniya nga wala mobayad og P100 mil sa hotel accommodations. (BANAT NEWS)