CEBU, Philippines - Gipahigayun kagahapon sa buntag ang ikalimang hugna sa kinalit nga drug test sa mga kawani sa Kapitolyo.
Si Joey Herrera, executive director sa Cebu Provincial Anti-Drug Abuse Commission, miingon nga lahi ang paagi sa drug testing nga nahitabo itandi sa nangagi.
Matud ni Herrera nakurat ang mga empleyado nga hingtungdan sa maong drug test kinsa nagtoo nga adunay seminar nga ipahigayun human sayo sa buntag nakadawat ang mga department heads og memorandum nga aduna’y ipahigayon nga drug test sa samang adlaw.
Ang mga empleyado gikan sa Cebu Provincial Detention and Rehabilitation Center, Engineering, General Services, Provincial Agriculture, Budget Office, Disaster and Management, Public Information Office, Accounting, Provincial Environment and Natural Resources Office, ug Planning. Matud ni Herrera nga 120 ka mga empleyado ang gipa-ubos sa maong drug test ug posibleng karong adlawa o ugma mahibaw-an kung adunay laing mag-positibo nga empleyado. Kung mapamatud-an nga positibo sa paggamit og ginadiling drugas ang empleyado, awtomatik nga matangtang sa iyang pwesto ug dili na makabalik sa trabaho sa Kapitolyo. (BANAT NEWS)