Polis, laing pito gidakop

CEBU, Philippines - Gidakop ang usa ka polis ug pito niya ka mga amigo nga nag-inom sa usa ka restobar sa Mango Square sa Mango Avenue ning dakbayan kagahapon, human ang maong polis giingong nagpabuto og armas.

Gipangunayan mismo pagsikop sa hepe sa Fuente Police Station, Chief Inspector Wildemar Tiu, si SPO1 Neri Cahimat, desk officer sa Mabolo Police Station ug ang pito ka mga kauban niini apil ang giingong tag-iya sa maong imnanan.

Si Tiu nga nahinabi sa Banat News mitug-an nga pag-abot nila sa sa maong lugar wala pa naghuman og inom ang grupo ni Cahimat.

Sumala pa ni Tiu nga wala ra gayud untay problema kung mag-inom sila, apan dili lang magpabuto og armas.

“Sa akong area pa g’yud niya gihimo, bisan pa og hangtod kanus-a sila maghuman og  inom okey ra basta dili lang magpabuto og armas, delikado kaayo naay maigo kay daplin biya na sa kalsada,” matud pa ni Tiu.

Nagduda si Tiu kun ang service firearm ni Cahimat nga .45 pistol mao ba ang gigamit sa pagpabuto nga maoy gitahan.

 “Tan-aw nako dili ‘to mao ang gipabuto, siguro naka-monitor to sila nga nagpaingon na mi, nakalugar sila og tago sa armas,” dugang pamahayag ni Tiu.

Hinoon ang mga gikainom ni Cahimat gibuhian na sa kapulisan, samtang nagpabilin sa detention cell si Cahimat kinsa kasohan og indiscriminate firing, alarm and scandal ug kasong administratiba.

Samtang sa pakighinabi sa Banat News sa deputy chief sa Mabolo Police Station nga si Inspector Ronilo Supatan, nasurpresa kini kay base sa iyang nasayran tarong nga polis si Cahimat.

Mag 27 ka tuig na sa serbisyo si Cahimat karong bulan sa Disyembre. (BANAT NEWS)