DPWH ug kagamhanan sa Mandaue nagtinabangay pagsulbad sa baha

CEBU, Philippines - Ang kagamhanan sa dakbayan sa Mandaue nakigtambayayong karon sa kadagkoan sa Department of Public Works and Highways (DPWH) aron kapangitaan og sulbad ang mga pagbaha panahon nga adunay kusog nga pagbunok sa ulan.

Ang tinguha sa mga opisyal sa Mandaue nga makigtinabangay sila nga mapahigayon ang proyekto nga pagpalawom sa mga kanal sa lainlaing dapit sa dakbayan.

Si Mandaue City Planning Officer Florentino Nimor miingon nga malaumon sila nga kun mahulipan na og dagko nga gidak-on ang mga imbornal sa dakbayan malikayan na ang kanunay paglunop kun adunay kusog nga ulan.

Matud ni Nimor nga ang DPWH nagpadayon sa ilang proyekto nga pagpalawom sa mga kanal nga nahimutang sa nasudnong mga karsada ug ang lokal nga kagamhanan naghimo usab og susama nga proyekto sa mga dalan nga iya dakbayan.

Gitataw ni Nimor nga naghimo sila karon og koordinasyon sa DPWH sa tuyo nga magkatakdo ang mga proyekto nga ilang gihimo. Dugang sa city planning officer nga tungod sa ilang koordinasyon sa DPWH hapsay ug epektibo ang pagsulbad nila sa suliran sa kanunay nga paglunop ug baha.

Si Nimor miingon nga ang giugmad karon sa DPWH nga proyekto mao ang pagpalawom sa mga kanal sa nasudnong karsada sama sa A.S. Fortuna, A.C. Cortes Avenue ug uban pa.

Gipasabot niya nga nakigtambayayong sila sa DPWH diha nga giplano pa ang maong proyekto sa tuyo nga masayod usab sila sa mga karsada nga sila sa Mandaue ang moatiman sa drainage systems.  (BANAT NEWS)