CEBU, Philippines - Ang Provincial Investigation and Detective Management Branch aduna nay duha ka tawo nga gitutokan nga posibleng adunay kalambigitan sa kamatayon sa American national nga si Stephen Ray Gornto, 53, kinsa gipatay sa gawas sa iyang pinuy-anan sa Barangay Balud, Dalaguete Huwebes sa hapon.
Si Senior Inspector Ramil Morpos, PIDMB investigator, mibutyag nga base sa mga witnesses nga gawas sa gunman adunay babaye sa gawas sa balay ni Gornto nga kalit sab nawagtang paghuman sa pagpatay sa biktima, gituohan ang maong babaye nga lookout.
“Prior to the shooting incident dunay babaye dapit sa nahitabuan unya paghuman sa insidente wala na diha unya wala kunoy nakaila adto matud sa taga-didto,” matud ni Morpos.
Dugang ni Morpos nga gawas usab sa British national nga si Andrew Featherstonehaugh, 53, nga nakasumbagay ni Gornto, aduna pa sad lain nga langyaw nga nakaaway ang biktima.
Ang cellular phone ni Gornto gipaubos na sa Digital Forensic Laboratory aron sa pagkuha sa mga text messages sa wala pa kini patya aron makakuha og clue ang kapolisan.
Si Gornto,usa ka retiradong sakop sa Special Forces sa Amerika natusak sa bala ang kalawasan human girakrakan sa nag-inusarang mamumuno nga nagsuot og crash helmet. (BANAT NEWS)