20 ka balay gilamoy sa sunog
CEBU, Philippines - Di mominus 20 ka panimalay ug establisamento ang naugdaw human gikaon sa kalayo dihang miulbo ang dakong sunog sa Sitio Ibaan, Barangay Banilad dakbayan sa Sugbo kagahapon sa hapon. Nadawat sa kabomberohan ang alarma alas 2:45 sa hapon ug nakontrolar kini sud sa trayenta minutos.
Matud ni Senior Fire Officer 2 Nick Ouano sa Cebu City Fire Station nga nagsugod ang sunog sa panimalay sa usa ka Raymond Bindo, wa pa matino ang hinungdan niini.
Base sa pamahayag sa mga residente sa lugar giingong kalit kaayo ang pagkatap sa kalayo.
Ang sunog giisa sa first alarm ug gibana-bana nga kapin sa P200 mil ang danyos nga gibilin niini.
Nasayran nga dili lang mga kabalayan ang gikaon sa kalayo apan lakip na usab ang pipila ka mga balay patigayon sa maong dapit sama sa mga kan-anan, ug cellshops.
Si Ouano miingon nga naglisod sila sa pag-penetrate sa lugar tungod sa kahagip-ot sa dapit ug maglisod sa pagsulod ang kabomberohan. Hinoon wala’y naangol sa maong panghitabo. (BANAT NEWS)
- Latest
