CEBU, Philippines - Ang Provincial Investigation and Detective Management Branch nakakita og igong rason sa pagpasaka og kasong administratiba nga grave misconduct batok sa usa ka pulis kinsa nakitang positibo sa drugas sa gipahigayon nga surprised drug test sa Sta. Fe Police Station.
Sa sobra 20 ka mga pulis, bugtong si PO1 Joecel Cabrera ang nagpositibo sa drugas sa gipahigayon nga surprised drug test sa Cebu Provincial Police Office adtong Pebrero.
Ang kasong administratiba anaa na sa Police Regional Office (PRO)-7 alang sa summary hearing. Gisuportaran usab sa confirmatory test gikan sa PNP Crime Laboratory-7 nga positibo gyud kini.
Usa sa general qualifications sa appointment sa pagsulod sa PNP mao ang pagpasar sa psychiatric o psychological, drug ug physical test nga himuon sa PNP o sa bisan unsang National Police Commission accredited hospitals.
Si Senior Superintendent Noel Gillamac, CPPO director, nagkanayon nga pinili lang nga mga police stations ang ilang pahigayunan sa suprise drug tests depende sa ilang mga nadawat nga mga report. Miangkon si Gillamac nga aduna sila’y nadawat nga reports nga adunay pulis nga tigamitan apan uban niini negative sa ilang gibuhat nga verification.
“Ang uban negative during verification others ato pang gitan-aw ang uban mao nang atong himuan og drug test kay lisod man pud og magpataka ta,” matud niya.
Pokus usab nila karon ang pagpakunhod sa supply ug demand sa drugas sa probinsiya. (BANAT NEWS)