CEBU, Philippines - Naangol ang usa ka lalaki human gidaro ang upat ka panimalay sa usa ka dump truck sa Sitio Bawod, Barangay Magdugo dakbayan sa Toledo kagahapon alas-2 sa kaadlawon. Giila ang biktima nga si Joel Iwayan kinsa nahinanok sa pagkatulog dihang midaro ang usa ka dump track nga iya sa Gama Farm nga nagbase sa lungsod sa Consolacion.
Ang maong dump truck gimaneho ni Peter Lauriano lumad nga taga Bukidnon nga gikan pa sa dakbayan sa Toledo naghatud og sinako nga feeds.
Sumala pa ni Toledo City traffic section assistant chief SPO3 Lorenzo Mahilum pag-abot sa kurbadahon nga bahin sa maong lugar kalit nga nawad-an sa kontrol ang drayber sa manobela ug nalahos sa mga panimalay. Nasayran nga gipanag-iya ang kabalayan sa mga pamilyang Iwayan ug Misa. Si Joel nakaangkon og mga bun-og sa kalawasan.
Mag-abot ang drayber ug ang mga tag-iya sa kabalayan aron sabutan ang pagbayad sa danyos sa mga nagubang mga kabtangan. (BANAT NEWS)