CEBU, Philippines - Naghinobra ang gasto sa kagamhanan sa dakbayan sa Talisay sa pagpamalit og close circuit television (CCTV) cameras balor og P3 milyones apan wala magamit ang katuyoan sa city-wide surveillance system.
Ang administrasyon ni kanhi mayor, karon Konsehal Socrates Fernandez, nakigkontrata sa niaging tuig sa Automated Technologies Inc. (ATI) alang sa proyekto.
Sa buwan sa Nobiyembre 2013, ang accomplishment sa proyekto giingong kompleto na ug ang siyudad mihatag na og pasiunang bayad ngadto sa contractor bali og P2,851,200 samtang dunay balanse nga P316,800.
Base sa COA technical evaluation report nga gipahigayon sa ilang Technical and Information Technology Services nasuta nga ang presyo sa kontrata sobra og P319,203.72 o 22.33 porsiyento subay sa COA cost evaluation.
Ang COA nipahimangno nga ang sobra nga kantidad ma-disallow kini kung ang siyudad mapakyas sa pagpabilin niini gikan sa suktonon sa kontraktor.
Matud usab sa COA nga ang tumong sa surveillance system wala magamit tungod kay wala’y tawo nga nagmando o nag-operate sa system diha sa command center.
Si Mayor Johnny de los Reyes misaad nga motuman sa rekomendasyon sa COA.
Giklaro ni de los Reyes nga ang mga gipagawas sa COA nahitabo sa panahon pa sa administrasyon ni Fernandez.
Si de los Reyes kinsa Hulyo 1, 2013 nang nilingkod nabalaka nga mapasanginlang ubos na sa iyang administrasyon ang maong kalapasan nga nasuta sa COA kabahin sa paggasto sa kwarta sa siyudad. (/GMR)(BANAT NEWS)