CEBU, Philippines - Nikunhod ang kaso sa malnutrisyon sa Central Visayas sa pagkakaron itandi sa niaging tuig sumala pa sa National Nutrition Council-7.
Gibutyag ni NNC-7 regional director, Dr. Parolita Mission, nga karong tuiga anaa na lang sa 5.54 porsiyento ang kaso sa malnutrisyon itandi sa miaging tuig nga 5.66 porsiyento.
Ang Negros Oriental ang nag-una sa may labing daghang kaso sa malnutrisyon nga gisundan sa Probinsiya sa Sugbo, Siquijor ug Bohol samtang nag-una sa mga dakbayan ang Guihulngan, Bais ug Naga.
Gihulagway ni Mission nga dako og natabang ang ilang kampanya pinaagi sa pakig-alayon sa nagkalain-laing sektor sa pagkunhod sa malnutrisyon.
Si Dr. Jaime Bernadas, regional director sa Department of Health-7, sa iyang bahin miingon nga dako og matabang ang breastfeeding aron ang usa ka bata himsog ug dili malnourish.
Ang grupong LATCH nagtinguha nga i-promote ang breastfeeding isip tinubdan sa nutrition alang niadtong mga gagmay'ng bata ug sa mga bag-ong gianak.
Nunot usab niini, nigahin og P231 milyones ang Department of Social Welfare and Development alang sa pagpadayon sa supplementary feeding program sa 132 ka mga local government units sa Central Visayas. Si DSWD-7 regional director Mercedita Jabagat nagkanayon nga ang programa makatabang sa pagminus sa gidaghanon sa mga malnourished nga mga kabataan.
Sa naasoy’ng gahin, P184,795,200 ang alang sa sud-an samtang P46,198,800 alang sa pagpalit og bugas sa National Food Authority (NFA). (/GMR)(BANAT NEWS)