Wanted sa kasong rape sa anak nasikop
CEBU, Philippines - Human sa kapin duha ka tuig nga pagtago-tago, nasikop sa kapolisan ang giilang usa sa top 7 most wanted persons sa lungsod sa Dalaguete nga may kasong rape sa iya ra usab kaugalingong anak.
Ang dinakpan mao si Cecillio Barangan, 54, taga Celeriohan, Dalaguete, kinsa adunay warrant of arrest sa unom ka kasong rape nga giluwatan ni Judge Maximo Perez.
Matud ni SPO3 Cleto Pia, imbestigador sa Dalaguete Police Station nga nahinabi sa Banat News, nga human napasakaan og kasong rape si Barangan, wala na kini nagpakita sa ilang lugar.
Dunay nakahatag og impormasyon nga didto ra sa hilit nga barangay sa dakbayan sa Toledo nagtago si Barangan hinungdan nga nagpadala dayon ang kapolisan og asset aron pagsuta kung unsa ka tinuod.
Human nagpositibo ang report, gilusad dayon ang usa ka operasyon aron pagsikop kang Barangan.
Didto sa payag sa sitio Pandong Bato, Media Onse, naaktohan sa kapolisan ang akusado nga nag-ilis paingon unta molakaw apan wala na makadagan pa.
Gawas sa mga kasong rape, mag-atubang og dugang kasong illegal possession og firearms ang dinakpan human nakuha gikan kaniya ang pugakhang ug .38 revolver nga gitudlo sa anak nga maoy ition kaniya kung siya lugoson.
Gitanggong na sa Dalaguete Police detention cell ang dinakpan kinsa gikatakdang itugyan ngadto sa Cebu Provincial Detention and Rehabilitation Center. (BANAT NEWS)
- Latest
