Patrolcar vs motor, tulo naangol

CEBU, Philippines - Usa ka polis ang naangol human nga nabanggaan ang ilang patrolcar sa usa ka motorsiklo nga miresulta usab sa pagkaangol sa mga sakay niini diha sa M.L. Quezon Avenue, Talamban ning dakbayan.

Ang naangol mao si PO1 Marcon Magnanao kansang bukton nabali human nalagpot kaniya ang sakay sa motorsiklong nibangga nila.

Ang maong patrol car sa Talamban Police Station gimaneho ni PO1 Noel Bureros ug tupad sab niini sa frontseat si PO1 Magnanao dihang nabangga kanila ang motor nga gimaneho ni Silverio Ybañez Cuyos ug angkas niini si Nachel Cayrow, pulos  taga Canduman , Mandaue City.

Sumala pa sa imbestigasyon sa Traffic Division nga paingon unta sa dapit diin magbutang og checkpoint ang patrolcar apan dihang nag U-turn kini nasampak ang motorsiklo kanila.

Tungod sa kakusog sa pagbangga nanglupad ang sakay sa motorsiklo ug si Magnanao maoy naigo sa usa kanila.

Ang duha ka mga sakay sa motor ang gidali sab pagdala sa tambalanan human nga nakaangkon og samad, bun-og ug pangos sa ilang kalawasan samtang si Magnanao nalandig sa Community Hospital ug gikatakdang ipaubos sa operasyon.

Ang Traffic Division naghimo pa og imbestigasyon pagtumbok kung kinsay sad-an sa maong aksidente. (BANAT NEWS)