Usa patay, upat angol sa aksidente

CEBU, Philippines - Usa patay samtang upat ang naangol sa duha ka managlahing aksidente sa kadalanan sa probinsya sa Sugbo sa nakalabay nga adlaw.

Patay ang drayber sa motor human nasangit kini sa usa ka Isuzu Prime Mover  nga nagguyod og trailer  diha sa National Road sa Barangay Poblacion sa dakbayan sa Danao. Giila ang biktima si Erik Gonzaga, 20, taga Gun-ob Lapu-Lapu ug naangol ang angkas niining si Ji-ar Bonghanoy, 18, residente sa Dap-dap Catarman Liloan.

Matud ni SPO1 Renante Manulat, Chief Investigator sa Traffic Management Office nga nahinabi sa Banat News ang Isuzu Prime Mover padulong kini sa International Pharmaceutical Inc. (IPI) aron maghatod og ethyl alcohol. Base sa imbestigasyon, gikan ang biktima sa LTO Danao padulong sa Lapu-Lapu dihang mi-overtake  sa gikatagbong Isuzu Prime Mover nga gimaneho ni Marcelo Iridera Cabañera, 38, taga Lamac, Consolacion.

Apan nasangit ang iyang ulo sa round bars sa maong truck samtang ang angkas niini nalagpot og 13- metros gikan sa motor.

Ang duha gidala sa tambalanan apan si Gonzaga  gideklarang patay na samtang si Bonghanoy daling gidala sa Vicente Sotto Memorial Medical Center. Sa laing aksidente, usa ka pribadong sakyanan ang nadisgrasya kagahapon sa buntag pipila ka metros sa lugar diin usab nalimbuwad ang Ceres bus sa Barangay Dawis Norte, lungsod sa Carmen atol sa pagbunok sa uwan.

Matud ni PO1 Nerbert Padayao, traffic investigator sa Carmen Police Station nga ang pick-up misawom sa fishpond human giingong na-slide ang ligid tungod sa kadangog sa dalan sa nahisgutang lugar.

Ang Nissan Navara nga nagtangag sa plakang YHZ 776 gimaneho ni Rodrigo Baguio kauban ang iyang asawa ug ang 5-anyos nilang anak dihang nahulog ang sakyanan sa fishpond nga dunay gilawmong lima ka tiil. Nasayran nga gikan sa lungsod sa Catmon ang sakyanan ug padulong unta kini sa siyudad sa Sugbo.  Giingon nga mi-overtake kini sa usa ka multicab apan na-slide ang ligid sa atubangan niini ug diretso sa pagkahulog sa  fishpond.  Daling gitabang sa mga residente ang mga biktima ug luwas ra sila nga nakagawas sa sakyanan apan  gidala sa tambalanan ang ilang anak human nakainom og daghang tubig gikan sa fishpond. (BANAT NEWS)