P7M gasto pagpaayo sa mga sakyanan sa Talisay usik
CEBU, Philippines - Pag-usik-usik sa pondo ang gihimo sa kagamhanan sa dakbayan sa Talisay ang paggasto sa kapin sa P7 milyones sa pagpaayo sa mga sakyanan sumala pa sa Commission on Audit.
Ang COA sa ilang 2013 audit report nipahimangno sa siyudad nga gidili na sa ilang lagda ang pagpaayo sa mga sakyanan sa gobiyerno kung mogasto na og lapas 60 porsiyento sa presyo sa pagpalit niini.
Gisanglitanan sa COA ang usa ka garbage compactor nga giayo upat na ka higayon sulod sa duha ka buwan ug managsama lang ang gipang-ilisan nga piyesa. Ang kagamhanan sa siyudad giingong nipadayun sa pagpaayo sa mga sakyanan bisan og gipahimangnoan na sa City Accountant ang mayor kabahin sa sobrang gasto gawas nga kuwang kini sa supporting documents ang transaksiyon.
Ang garbage compactor nga nagtangag sa plakang SGU-742 napaayo kini upat ka higayun sulod sa duha ka buwan diin mokabat sa P1,135,000 ang gasto.
Matud sa COA nga makadaginot unta ang siyudad kung mipalit pa kini og brand new o surplus units.
Ang technical working group sa siyudad nagkanayun nga misubay lang sila sa canvass nga gipahigayon sa General Services Office (GSO) ubos sa rekomendasyon sa chief mechanic.
Ang COA mikwestiyon kung ang Bids and Awards Committee (BAC) ug TWG misusi ug mi-validate ba sa purchase requests sa wala pa ayoha ang mga units aron mahibaw-an unta kung pila ang magasto sa pagpaayo.
Ang COA mirekomendar sa pagpahigayun og imbestigasyon aron matumbok ang mga responsable sa kalapasan. - /GMR (BANAT NEWS)
- Latest
