Science Lab tukuron sa Toledo

CEBU, Philippines - Nagkauyon ang Department of Education ug kagamhanan sa dakbayan sa Toledo nga magtukod og usa ka Science Laboratory sa siyudad aron mapalambo ang kahibawo sa mga tinun-an.

Ang DepEd Toledo City Division nitagana og P12 milyones nga budget alang sa maong laboratoryo lakip na ang mga ekipo samtang ang Local School Board may gahin usab nga P41 milyones alang sa tuig 2014.

Plano nga tukuran sa maong edepisyo ang North, South, East ug West districts.

Gihuwat na lang ang pagpagawas sa pondo aron masugdan na ang pagtukod sa maong laboratoryo.

Sa sayong bahin ning tuiga, giaprobahan sa konseho sa dakbayan sa Toledo ang resolusyon alang sa annual budget sa LSB alang sa katukuran sa Science Lab ug ubang gastohanan sa DepEd.  (BANAT NEWS)