CEBU, Philippines - Gitigbas sa iyang silingan nga hubog ang usa ka lalaki nga nakiglalis sa iyang asawa niadtong Domingo sa gabii sa Zone Pechay, barangay Paknaan, dakbayan sa Mandaue. Nakaangkon og samad sa iyang sampot si Rey Quiamco, 24-anyos, construction worker, human tigbasa sa iyang silingan nga si Nicholas Soon, 61-anyos, parehong construction worker.
Si PO2 Gerald Magpantay sa Presinto 3 sa Mandaue City Police Office (MCPO) nga nahinabi sa Banat News miingon nga nagkalalis ang biktima ug ang iyang asawa diha sulod sa ilang panimay.
Ang suspetsado nga nakadungog sa maong panaglalis mikuha og sundang ug miadto sa panimay sa magtiayon dayon tigbas sa biktima sa wala’y igong hinungdan. Human sa pagtigbas nagdali pagsibat pahilayo sa maong dapit ang suspetsado ug ang biktima daling gidala sa iyang sakop sa pamilya sa Mandaue City District Hospital.
Matud ni Magpantay nga ang suspetsado nadakpan sa follow up operation sa mga barangay tanod ug kapolisan ug gipaubos sa liquor test diin nasuta nga positibo nga hubog dihang nahitabo ang pagpanigbas.
Ang suspetsado nagtingkagol sa detention cell sa kapolisan ug pasakaan og kasong frustrated homicide ug kalapasan sa ordinansa sa siyudad batok paghubog-hubog. (BANAT NEWS)