CEBU, Philippines - Gitug-an sa Commission on Election sa probinsya sa Sugbo nga posibleng hayan suspensohon sa ilang buhatan ang pagpatuman sa continuing registration sa mga bag-ong botante karong umaabot bulan sa Oktubre ning tuiga hangtud sa bulan sa Pebrero sa sunod tuig.
Kini kun ang Kongreso dili mopasar og balaod nga magsuspenso na usab sa election sa Sanguniang Kabataan (SK) o ba kaha hingpit nga mag-abolish sa SK.
Gipasabot ni Provincial Election Supervisor Lionel Marco Castillano sa interview sa usa ka sibyaanan nga mapugos sila sa paghunong sa continuing registration alang sa 2016 Elections sa naasoy nga mga bulan tungod kay ang ilang mga kawani mangandam man sa tanang mga gikinahanglanon alang sa pagahimuon nga SK Elections sa tuig 2015.
Giangkon ni Castillano nga maapektahan ang ilang preparasyon sa presidential ug local election sa 2016 apan iyang giklaro nga ang ilang buhatan andam kanunay nga motuman sa balaod alang sa pagpahigayon og election sa SK sa sunod tuig.
Ang Kongreso mioktaba sa SK Elections sa nakalabay nga tuig ug gisibog kini sa sunod tuig. (BANAT NEWS)