CEBU, Philippines - Tungod sa subsob nga kampanya sa ilegal nga drugas sa kapulisan sa dakbayan sa Sugbo gikatahong mimahal na ang presyo sa shabu dinhi sa dakbayan sa Sugbo.
Kini ang gibutyag ni Superintendent Romeo Santander ang hepe sa City Intelligence Branch (CIB) nga nahinabi sa mga tigbalita kagahapon base sa nakuha nilang intelligence report. Sumala pa ni Santander apektado na ang negosyo sa drugas sa mga drug lords dinhi sa Sugbo tungod sa nagsunod nga operasyon nga miresulta sa pagkasikop sa ilang mga sinaligan nga drug pushers ug pagkasakmit sa gibanabanang P10 milyones na nga kantidad sa shabu ug marijuana.
Sa labing ulahi nga operasyon, napatay sa CIB ang level 2 drug pusher sa Sitio Riverside, Barangay Duljo Fatima nga giila nga si Lloyd Cabahug, 42, nga nagpuyo ra sab sa maong lugar nga nakuhaan og 29 ka medium sized nga high grade nga shabu.
Naangol usab sa maong hitabo ang usa ka Edward Adaza kinsa sa follow-up report nga migawas sa Banat News nga maoy nakalas apan nasuta nga naigo ra kini sa saag nga bala ug wa siya’y kalabotan sa operasyon sa illegal drugs sa napatay nga si Cabahug.
Si Adaza giingong nagtan-aw ra og telebisyon dihang nagbutobuto ug nakamatikod nga natapsingan og bala sa iyang liog. “Apektado na g’yud ang ilang negosyo, mao pud na ang hinungdan nga mimahal ang drugas,†matud pa ni Santander. Giawhag ni Santander ang publiko nga motabang pinaagi sa paghatag og impormasyon kun si kinsa sa ilang lugar ang namaligya og illegal drugs ug gipasalig nila dili ibutyag ang pangalan sa mga mohatag og impormasyon. (BANAT NEWS)