CEBU, Philippines - Ang General Services Office (GSO) sa dakbayan sa Talisay gimandoan ni Mayor Johnny De los Reyes sa pagpadali og pasiga sa mga suga sa poste diha sa Cebu South Coastal Road (CSCR) habig sa Barangay Lawaan I ug II.
Mabantayan nga taud-taud na nga wala magsiga ang mga suga sa poste sa CSCR habig sa dakbayan sa Talisay diin delikado kini sa aksidente sa mga motorista nga moagi sa lugar panahon sa gabii.
Ang mga wire sa poste gipangawat hinungdang wala na mosiga ang mga suga.
Giingon nga mga menor de edad ang nasakpan kaniadto nga nangawat sa mga wire ug ang mga nakawat nga wire gipatimbang na.
Si De los Reyes mibutyag nga nakadawat siya og mga report nga misiaw ang insidente sa tulis ug pagpanglabni diha sa nahisgutang mga dapit panahon sa kagabhion tungod sa kangitngit.
Dugang sa mayor nga pabantayan niya ang tibuok CSCR aron dili na pangawaton ang mga wire.
Maobserbahan usab nga dunay mga suga nga mangabuak tungod kay batoon kini sa mga badlongon lakip gani ang suga sa traffic light apilon usab nila sa paglabay og bato. (BANAT NEWS)