Sunog sa Danao usa angol

CEBU, Philippines - Nagkagubot ang mga residente sa dakbayan sa Danao pasado ala una kagahapon sa kaadlawon human usa ka sunog ang miulbo sa Bonifacio Extension.

Si FO2 Erwin Castañeda sa Danao City Fire Station nga nahinabi sa Banat News nagkanayon nga didto sa panimalay sa magtiayong Bryan ug Jona Laudie nagsugod ang sunog.

Sumala pa nga sa ika-duhang andana sa maong balay gituohan unang miulbo ang kayo hangtud naugdaw gyud ang maong panimalay.

Nakaangkon og second degree burn ang usa sa mga nagpuyo sa maong panimalay nga si Shandy de Lara nga nahinanok sa pagkatulog ug daling gidala sa Danao District Hospital. Pipila ka minutos nakontrolar sa kabom-berohan ang sunog nga wala na nakakatap sa mga silingang balay samtang gisuta pa kung pila ang danyos ingon man ang hinungdan sa sunog.

Samtang gidakop sa kapolisan sa Presinto 6 sa Mandaue City Police Office (MCPO) ang usa ka tawo nga nalutsan og warrant of arrest tungod sa kasong arson.

Ang gidakop pasado alas tres kagahapon sa hapon sa ilang panimalay sa Zone 1, Purok Bombil, Canduman mao si Almar Tanocan Jiminez, 30 anyos.

Si Senior Insp. Rommel Luga, hepe sa maong presinto, ang nisikop sa akusado pinasikad sa warrant of arrest nga giluwatan ni Judge Alexander M.V. Acosta sa Branch 9 sa Regional Trial Court, dakbayan sa Sugbo.

Ang warrant of arrest gipagawas niadtong Mayo 29 ni Acosta kinsa mirekomendar sa piyansa nga P40,000.

Si SPO1 Rey Manatad sa Presinto 6 sa MCPO nga nahinabi sa Banat News miingon nga nag-atubang og kasong arson si Jiminez nga nahitabo sa dakbayan sa Sugbo. Ang akusado temporaryo gitanggong sa detention cell sa Presinto 6 sa MCPO nga nagbase sa Barangay Canduman, dakbayan sa Mandaue. (BANAT NEWS)