CEBU, Philippines - Ang siyudad sa Mandaue mohangyo sa Malacañang nga ideklarar nga holiday ang ika-45th nga Charter Day sa dakbayan karong Agosto 30 ning tuiga.
Gitinguha sa konseho sa dakbayan sa Mandaue nga madeklarar ni Presidente Benigno Aquino III nga holiday ang maong adlaw sa Mandaue.
Si Konsehal Diosdado Suico miduso og resolusyon nga gisuportahan usab dayon sa mga kaubang konsehal aron mapadangat sa pangulo ang maong hangyo.
Ang Mandaue City nahimong siyudad human giaprobahan ang Republic Act 5519 nga nagdeklarar sa Mandaue nga usa ka dakbayan niadtong Hunyo 21, 1969.
Si kanhi presidente Ferdinand Edralin Marcos mipagawas sa Presidential Proclamation No. 586 pinaagi sa iyang Executive Secretary nga si Ernesto Maceda nga naghimong balaod sa maong deklarasyon niadtong Agosto 30,1969 nga maoy pagsugod isip dakbayan.
Si Bise Mayor Glenn Bercede miingon nga kun madeklarar nga holiday ang Mandaue nianang adlawa, daghang mga tawo unya ang makahigayon pagsaksi sa nagkadaiyang kalingawan nga pasiugdahan sa kagamhanan sa maong adlaw. (BANAT NEWS)