Gasolinahan gitulis, sikyu gidisarmahan

CEBU, Philippines - Usa ka gasoline station sa Calajoan, Minglanilla gitulis sa duha ka lalaki, 16 mil ka pesos ug .38 revolver sa guwardiya gikuha sa mga tulisan.

Duha ka mga tulisan ang giingong nagpatuo nga mga kustomer ang  midisarma sa guwardiya nga si Zacarias Noya, 58, kinsa wala magtuong mga tulisan diay ang duha.

Matud pa ni PO2 Vicente Aliñabo sa Minglanilla Police Station nga nahinabi sa Banat News nga nangabot ang duha ug nagpakaaron-ingnong magpatobil, apan ang usa diay milipot na sa gwardiya ug gidisarmahan kini. Samtang ang usa midiretso sa kahero nga si Benedict Tañada ug gitionan kini og armas dayong kuha sa  kinitaan nga P16 mil ug duha ka mga cellphone.

Si Tañada mibutyag nga wala mabantayi sa mga tulisan nga duna siyay sekretong gitagoan nga halin nga mokabat og P30 mil nga wala maapil og kuha.

Gisubay na sab karon sa kapulisan ang close circuit television (CCTV) sa maong establisemento, sa pamasin nga nakuhaan ang panagway sa duha ka tulisan nga miikyas padung sa dakbayan sa Talisay. (BANAT NEWS)