CEBU, Philippines - Kinahanglang sayon sa paglihok alang sa katiguwangan ang mga tambalanan sa dakbayan sa Sugbo.
Kini ang unod sa ordinansahon nga giduso ni Konsehal Mary Ann delos Santos nga padayung gituki sa konseho sa dakbayan.
Atol sa sesyon kagahapon, gisugyot ni Lorence Garcia, magtutudlo sa Cebu Normal University – College of Nursing nga mas nindot usab nga mapalig-on pa ang mga subject sa eskwelahan nga may kalambigitan sa pag-atiman sa mga tiguwang.
Ang nirepresentar sa katiguwangan nga si Dr. Amparo Florida miingon nga mas nindot alang kanila ang maong ordinansa.
Apan alang kaniya, mas nindot gyud unta nga makapatukod ang siyudad sa Sugbo og tambalanan nga alang ra gyud sa mga tiguwang.
Gipakita ni Architect Maria Lizeta Uy ang physical design sa himoong elderly-friendly ward sa mga ospital.
Matud ni Dr. Daisy Villa, hepe sa Cebu City Health Department, nga mas gihatagan og bili ang bedroom kaysa sa medical facilities base sa desinyo.
Alang kaniya mas hatagan unta og dakung importansiya ang medical nga aspeto sa mga facilities kay sagad sa magpa-ospital mangayo og atensyong medikal ug dili magpaharuhay lang.
Tun-an pa sa konseho ang mga sugyot nga nitumaw kagahapon. (BANAT NEWS)