Mga tinun-an nagpasinguwan, nag-rally wa’y nahimo

CEBU, Philippines - Nagpasinguwan apan wala’y nahimo ang grupo sa mga tinun-an nga nipahigayun og rally batok usbaw sa matrikula atubangan sa buhatan sa Commission on Higher Education-7 sa dakbayan sa Sugbo kagahapon.

Ang National Union of Students of the Philippines, STAND sa University of San Carlos, ug Nagkahiusang Kusog sa Estudyante sa University of the Philippines gisuportahan sa Anakbayan ug Kabataan Party-lists sa ilang pagkwestiyon sa giaprobahan nga umento sa matrikula sa 21 ka tunghaan sa rehiyon 7.

Apan kasagmuyo lang ang naangkon sa grupo sanglit wala’y opisyal sa CHED-7 nga niatubang samtang si Regional Director Freddie Bernal didto sa Manila.

Matud ni Niño Olayvar sa Anakbayan nga mobalik sila sunod semana aron makig-atubang sa mga opisyal sa CHED-7.

Iyang gihagit ang kabatan-onan nga supak sa pagsaka sa tuition fees sa ilang tunghaan nga manginlabot sa ilang kalihukan tungod kay ila kining katungod nga makahibawo nganong dali ra kaayong motugot ang CHED sa pagpasaka sa matrikula.

“Wala na sa gidaghanon, kondili naa na sa issue nga gidala,” matud ni Olayvar.

Giingong wala’y tarung nga konsultasyon ang mga tunghaan nga yanong nagpatuman sa usbaw sa bayranan. Gihulagway sa mga tinun-an nga misamot kalisud ang kahimtang sa ilang mga ginikanan tungod kay mas midako man ang gipas-an nga suliran.

Ang mga tinun-an dili motoo nga ang gipangayong usbaw adto paingon sa pagpalambo sa pasilidad sa mga tunghaan kun dili alang kini sa sweldo sa mga magtutudlo. (BANAT NEWS)