CEBU, Philippines - Gipusil ug gidunggab pa gyud og unom ka higayon ang usa ka lalaki nga giingong sinaligan ni boxing promoter ug negosyanteng si Wacky Salud, pasado alas 8 kagahapon sa buntag diha sa I. Tabura Street, Barangay Poblacion Pardo ning dakbayan sa Sugbo.
Giila ang biktima nga si Teodomero Gabuya, 56, taga Sitio Injang, Quiot ning dakbayan sa Sugbo. Samtang ang suspetsado naila nga si Richard Vildosola, nagpuyo ra ‘sab sa maong lugar.
Matud pa ni PO1 John Erick Samosa sa Homicide Section sa Cebu City Police Office (CCPO) nga gitahasan ang maong biktima nga maoy sinaligan ni Salud sa iyang luna sa maong lugar diin usab magpuyo ang suspek.
Giingong nasuko ang suspek tungod sa pagpapahawa kanila ug samtang gihinloan ang maong dapit miduol ang suspek ug diretso nga gipusil sa likod nga bahin ug pagkahuman gidunggab pa gyud kini unom ka higayon diha sa liog.
Dali pa unta nga gidala sa tambalanan ang biktima apan nakabsan gayod kini sa iyang kinabuhi. Nakuha sa kapulisan sa crime scene ang usa ka bala ug usa ka kabhang sa bala sa kalibre .45.
Gidugang pa ni Samosa nga sa nakalabay nga semana, gikataho nga nagkaaway ang duruha gumikan gihapon kay papahawaon na ang suspek sa maong lugar.
Ang suspek padayon pang gipangita sa kapolisan apan gikatakda kining pasakaan og kasong pagpatay. (BANAT NEWS)