CEBU, Philippines - Gipahibawo sa National Food Authority nga stable ra ang presyo sa bugas sa Central Visayas itandi sa Metro Manila nga misaka og tag P2 ang matag kilo.
Matud ni NFA-7 Regional Director Danilo Bonabon nga iyang gimandoan ang iyang mga sakop nga sa dili pa mosulod sa trabaho kinahanglan nga moagi una sa kamerkaduhan aron mamonitor ang presyo sa bugas.
Gidugang ni Bonabon nga kun ang presyo sa bugas anaa sa P40 matag kilo, normal lang kini tungod kay ang humay human sa ting-ani mapalit sa P20 matag kilo ug madoble ang presyo inig abot sa kamerkaduhan.
Gihimug-atan sa NFA-7 nga bisan og mahal ang presyo sa bugas sa ubang lugar apan dili kini makaapekto sa rehiyon tungod na sa alternatibo nga pagkaon nga mao ang mais.
Sa pagkakaron regular pa ang suplay sa bugas nga moabot sa rehiyon samtang hugot ang ilang pag-monitor sa mga mangabot nga bugas gikan sa ubang lugar.
Samtang ipasalig sa NFA nga ilang susihon ang reklamo may labot sa mga bugas sa NFA nga isagol sa commercial rice.
Matud ni Bonabon nga adunay gipirmahan nga memorandum of agreement ang mga NFA rice retailers nga kadtong ilang masakpan dili na makabaligya sa NFA rice.
Sunod semana mopagawas og laing klase sa NFA rice ang ahensiya ug ang presyo anaa sa P30 matag kilo tungod kay maayo ang klase sa bugas. - /GMR (BANAT NEWS)