Bag-ong OIC President sa TCC gitudlo

CEBU, Philippines - Nitudlo na og bag-ong presidente sa Talisay City College ang Board of Trustees (BOT).

Kasamtangang gitudlo sa BOT si Dr. Joseph Sol Galleon kinsa Associate Dean sa Cebu Normal University (CNU). Sa ulahing tigum sa BOT, si Commission on Higher Education-7 Regional Director Freddie Bernal mipahibalo nga ang ilang hangyo nga siya una ang mulingkod isip acting president sa TCC gibasura sa ilang labaw nga si CHED Chairperson Patricia Licuanan.

Niadtong buwan sa Mayo, si Bernal mao una ang temporaryong midumala sa TCC tungod sa nahitabong kasamok dihang duha ka presidente ang milingkod sa tunghaan nga sila si Richel Bacaltos kinsa gitudlo sa BOT ug Dr. Paulus Mariae Cañete nga gitudlo ni Mayor Johnny De los Reyes. Apan matud ni Bernal nga dili siya makapadayon paglingkod isip acting president sa TCC tungod kay ang ilang labaw’ng buhatan dili motugot hinungdang si Galeon ang gitudlo sa pwesto nga giuyonan usab sa BOT. Ang TCC Board gilangkuban sa 11 ka sakop kinsa ang mayor maoy chairman ug ang presidente sa tunghaan maoy vice chairman, si kanhi Kong. Eduardo Gullas sa unang distrito sa probinsiya isip honorary member ug si Talisay City schools division superintendent Woodrow Denuyo maoy board secretary.

Ang ubang miyembro sa Board mao ang mga pangulo sa committee on education ug budget and finance sa konseho sa dakbayan, presidente sa CNU, presidente sa Cebu Technological University (CTU), regional director sa CHED, city treasurer ug presidente sa Talisay Chamber of Commerce. (BANAT NEWS)