CEBU, Philippines - Mipasar og resolusyon ang konseho sa Barangay Apas nga ilang gisumiter ngadto sa lokal nga kagamhanan sa dakbayan sa Sugbo aron awhagon ang Local Housing Board nga ipadali ang pagpangita og luna nga kabalhinan sa demolisyon sa Sitio San Miguel.
Si Kapitan Ramil Ayuman maoy mihatud sa maong resolusyon nga lakip ilang sugyot nga ipasusi ang usa ka hektaryang luna nga gipanag-iya ni Atty. Avenecio “Aven†Piramide sa Barangay Pit-os nga mamahimo nilang kabalhinan. Sukad niadtong Marso 24 dihang gi-demolis ang ilang mga balay sa San Miguel wala pa sila makakita og kabalhinan.
Ang maong luna nagkantidad og P2 mil matag metro kuwadrado nga sa tan-aw sa konseho sa Apas ma-afford ra sa siyudad. Gusto sa mga residente nga adto na lang sila mobayad sa siyudad ubos sa housing program sa siyudad.
Dunay ubang residente nga boluntaryong miguba sa ilang pinuy-an ang midawat og bayad gikan sa nangangkong tag-iya sa Lot 942 ug Lot 947 nga si Aletha Suico Magat. Matud ni Ayuman nga pabor ang mga residente sa luna nga gitanyag diha sa Pit-os ug naghuwat na lang ang mga molupyo sa desisyon sa kagamhanan.
Si Atty. Rosell Collin sa Division of the Welfare for the Urban Poor miingon nga ilaha pang tan-awon ang maong luna kun angayan ba kining paliton. (BANAT NEWS)