Bahin sa V. Rama Ave. sementohon na

CEBU, Philippines - Sugdan na ang pagsemento sa bahin sa dalan V. Rama gikan sa eskina B. Rodriguez hangtud eskina Alcantara, dakbayan sa Sugbo.

Ang Department of Public Works and Highways migahin og P44 milyones alang sa proyekto nga may kapin usa ka kilometro ang gitas-on.

Matud ni Alfred Tiu, project engineer sa PLD Construction, nga ang trabaho magsugod alas 9 sa gabii hangtud alas 5 sa buntag.

Ang proyekto gikatakdang mahuman sulod sa 210 ka adlaw nga mao usab ang gihatag nga tagal sa konseho sa syudad sa Sugbo.

Sila si Atty. Jose Daluz III ug City Traffic Operations Management operations chief Joy Tumulak mihangyo kang Tiu nga seguradohon ang pagbutang sa mga signages aron paglikay sa disgrasya.

Gibutyag ni Barangay Calamba Kapitan Maria Yvonne Feliciano nga daghan na ang nangamatay sa maong dapit ilabi na sa gabii tungod sa kakuwang sa signages.

Karong Martes si Tumulak moduso sa iyang proposal ngadto kang Daluz, DPWH project head Rachel Lumapas ug sa PLD Construction. (BANAT NEWS)