CEBU, Philippines - Nagtingkagol sa Talisay City detention cell ang usa ka lalaki kinsa gipasanginlang nag ugay-ugay sa iyang kinatawo diha sa publiko atubangan sa usa ka 15-anyos nga dalagita niadtong Miyerkules sa gabii diha sa Barangay San Roque, dakbayan sa Talisay.
Ang suspetsado mao si Gerry Cabrera, 21, nga drayber og traysikad ug residente sa Barangay Tanke, dakbayan sa Talisay.
Sa imbestigasyon ni PO1 Rechel Abellanosa sa Women and Children Protection Desk (WCPD) sa Talisay City Police Station (TCPS) nga sa wala pa mahitabo ang insidente ang dalagita gisugo sa iyang inahan diha sa gawas.
Matud sa dalagita nga si Cabrera mitutok kaniya og tan-aw dayon nangutana kung aduna ba siya’y sigarilyo. Dihang mibalibad ang dalagita nga wala siya’y sigarilyo ang suspetsado giingong milakaw ug misuot diha sa sudlonong lugar.
Apan sa pagbalik na sa dalagita pauli sa ilaha kalit nga miatubang kaniya ang suspek nga nag-ugay sa kinatawo hinungdan nga midagan siya sa tindahan ug nangayo og panabang sa tindera.
Ang amahan sa dalagita uban sa ilang silingan miadto sa lugar nga nahitaboan ug naabtan pa nila ang suspetsadong nagpadayon pa sa iyang malaw-ay nga gibuhat hinungdan nga kini gidakop ug gitugyan ngadto sa kapolisan.
Si Abellanosa mibutyag sa Banat News kagahapon nga napasakaan na kagahapon sa hapon diha sa piskaliya sa siyudad og kasong “grave scandal in relation to RA 7610†kun “Child Abuse†ang suspetsado. (BANAT NEWS)