Drayber patay, 2 ka tinun-an angol
CEBU, Philippines - Patay ang drayber samtang angol ang duha ka estudyante human dasmagi og sakyanan ang ilang gisakyang traysikol alas 6:20 kagahapon sa buntag sa Barangay Bangkugon, Oslob.
Ang namatay mao si Maximo Ondiano, 79, minyo, nagpuyo sa maong lugar samtang nangaangol sila si Liza Lirasan, 13, grade 7 ug Romeo Limbrada, 15, nagtungha sa Tan-awan National High School.
Ang drayber sa Toyota Hilux nga nakabangga nailhan nga si Krista Jee Llamas Neve, 28, biyuda ug lumad nga taga Dumaguete, Negros Oriental.
Matud ni PO1 Carmelito Dacula sa Oslob Police Station nga nahinabi sa Banat News nga paingon sa Poblacion, Oslob ang duha ka sakyanan apan kalit lang miliko ang traysikol samtang wala na makapugong ang nagsunod nga Hilux.
Sumala pa ni Dacula nga daw sa gilukot ang traysikol ug ang motorsiklo nga napaslak sa Hilux.
Dali untang gidala sa Oslob District Hospital ang mga biktima apan nakabsan gyud sa kinabuhi ang drayber sa traysikol samtang ang duha ka estudyante ang daling gibalhin sa Vicente Sotto Memorial Medical Center (VSMMC).
Boluntaryong nitahan sa kapolisan ang drayber sa Hilux samtang nagpaabot kung mopasaka ba og kaso ang pamilya sa namatay nga drayber. (BANAT NEWS)
- Latest
