P3M shabu nasakmit
CEBU, Philippines - Nasikop sa Regional Anti-Illegal Drugs Special Operations Task Group (RAIDSOTG) 7, ang duha ka level 2 drug pusher nga babaye nga nakuhaan og shabu nga nagkantidad og gibanabanang P3 milyon.
Gipangulohan ni Senior Inspector Henrix Bancoleta sa RAIDSOTG-7 ang buy- bust operasyon diha sa eskina sa Natalio Bacalso Avenue ug Salazar Street, Barangay Labangon, Cebu City.
Giila ang mga nasikop nga sila si Teresa Bulambao, 40, taga lungsod sa Tuburan, Cebu, apan kasamtangan nga nagpuyo sa maong lugar, ug Cristita Montebon, 48, taga Villagonzalo II, Barangay Tejero, Cebu City.
Matud pa ni Bancoleta nga taudtaod na nilang gipaubos sa surveillance ang maong mga suspek, human sila nakadawat og impormasyon ma’y kalabutan sa ilegal nga negosyo sa duruha.
Usa ka polis ang gihimo nga poseur buyer sa kapulisan, diin dihang nagpositibo sa drugas ang nakuha sa kapulisan, gisunod gilayon sa pagsikop kanila.
Nakuha kanila ang duha ka dagko nga putos sa drugas nga dunay street value nga P3 milyon , matud pa sa duha dili ilaha ang maong mga drugas kay gisugo ra sila. Sumala pa ni Bancoleta gikan sa Muntinlupa City ang supplier sa duha.
Kahinumdoman nga niadtong milabay’ng Domingo, nadakpan usab ang inahan ug anak nga sila si Editha ug Maricris Paul nga nakuhaan og P8 milyones nga shabu nga gikan gihapon sa Muntinlupa. Gitanggong na sa detention cell sa Regional Office ang duha ka dinakpan ug mag-atubang og kalapasan sa R.A 9165 o kalapasan sa paghupot og ilegal nga drugas. (BANAT NEWS)
- Latest
