Polis gikulata sa mga hubog

CEBU, Philippines -  Polis nga miresponde unta og kagubot didto sa Barangay Paknaan, dakbayan sa Mandaue gitabangan na hinuon pagkulata human giilogan sa iyang armas ug nakaangkon kini’g daghang bun-og sa kalawasan.

Ang nabukbokan sa mga tawo nga iyang gibadlong mao si PO3 Michael Cortes, 34, taga Barangay Opao, Mandaue ug nadestino sa Operations Branch sa Mandaue City Police Office (MCPO).

Gisuwerte lang si PO3 Cortes kay adunay tulo ka standby nga nakakita nga gitabangan siya og kulata sa upat ka tawo nga una’ng nag-away ug giluwas siya aron dili makasinati og dugang bun-og.

Si PO2 Gerald Magpantay sa MCPO Precint 3 mitug-an nga tulo sa upat ka tawo nga mikulata ni PO3 Cortes nadakpan sa follow-up operation nga gihimo sa mga polis.

Ang tulo nga nadakpan mao sila si       Alvin Patigas, 22, Allan Patigas, 47, minyo, pareho nga taga Barangay Bacayan, dakbayan sa Sugbo ug si Edilberto Fernandez, 34, taga Barangay Manatad, lungsod sa Sibonga.

Ang ika-upat nga suspek giila nga si Romeo Patigas, hingkod ang panuigon nga nagpuyo sa Barangay San Jose, dakbayan sa Sugbo apan wala pa madakpi sa mga polis. Matud ni PO2 Magpantay nga si PO3 Cortes naglakaw didto sa Zone Paleya sa Barangay Paknaan kaniadto’ng Lunes sa gabii diha nga nakit-an niya ang grupo sa mga tawo nga nag-away.

Si PO3 Cortes miduol ug gibadlong ang mga tawo apan usa kanila milipot sa polis ug gihapak og gahi nga butang ang ulo sa polis samtang lain ang mikuha sa iyang armas. Ang upat ka tawo nga nag-away nagtinabangay na hinuon sa pagkulata sa polis. Dunay tulo ka estambay nga miluwas ni PO3 Cortes ug milaban kaniya pinaagi sa pakig-away sa upat.

Usa sa upat nga mikulata sa polis nagunitan sa mga estambay samtang ang laing tulo nag-iyahay pagpanago diha nga miabot ang Mobile Patrol Group.

Nadakpan ang laing duha apan ang ika-upat nakamaneho sa pag-eskapo, hinuon nailhan ra ang iyang ngalan. Ang armas ni PO3 Cortes nakuha ra pagbalik gikan sa tulo ka dinakpan nga nakuhaan usab og mga dahon sa marijuana ug positibo usab sila sa liquor test.   (BANAT NEWS)