CEBU, Philippines - Usa ka doktor ang nabiktima sa pagpangawat sa iyang kaugalingon nga katabang, nga usa pa lang ka adlaw nga nagtrabaho sa ilang panimalay.
Ang biktima naila nga si Dr. Richard Condor, Consultant Orthopedic Surgery, 45, minyo ug nagpuyo sa Community Subdivision , Barangay Tisa, Cebu City.
Matud pa ni Condor nga niadtong adlaw nga Domingo samtang sila misimba, nabilin sa ilang panimalay ang iyang bag-ong nadawat nga katabang nga ila lang naila nga alyas Liza.
Apan sa ilang pag-uli nianang pagkahapon wala na sa iyang balay ang maong katabang ug apil ‘sab nga nawala ang mga alahas ug mahalong butang nga nagkantidad kapin 300 mil ka pesos.
Gihulagway ni Condor nga tambokon ang suspek, tabunon ang pamanit, chinita, 5’5 ang gitas-on ug anaa sa 28 hangtod 34 anyos ang edad.
Dugang pa ni Condor sa saysay niini sa kapulisan sa TRS nga usa sa iyang kaila ang maoy mipaila-ila kaniya sa usa ka alyas Liza nga gusto nga mosulod nga katabang tungod kay nangita man sila og mobantay sa ilang balay ilaha kining gidawat bisan wala mopresentar og dokumento ang maong babaye.
Matud pa ni Chief Inspector Noli Cernio nga gikinahanglan nga mag mabinantayon gayud bisan kinsa man gusto nga mokuha og katabang sa panimalay.
Duda si Cernio nga miyembro sa usa ka grupo sa mga kawatan ang maong babaye. (/EIM)(BANAT NEWS)