Mama, anak nakuhaan 1 kilong shabu

CEBU, Philippines - Usa ka kilong shabu nga gibanabanang mokantidad og P8 milyones ang nasakmit sa mga sakop sa Philippine Drug Enforcement Agency-7 gikan sa inahan ug anak nga maninda og sud-an nga taga Barangay Lorega-San Miguel ning dakbayan sa Sugbo.

Giila ni PDEA-7 regional officer Esperidion Javier ang mga dinakpan nga sila si Editha Paul, 58, ug anak niining si Maricris Paul, 32, pulos taga dalan M.J. Cuenco Avenue .

Matud pa sa impormasyong gihatag sa PDEA-7, ang maong shabu gibahin og 20 ka dagkong pakete ta’g singkwenta ka gramos matag pakete nga gisulod sa gikulit nga bahin sa lapa-lapa sa mga clogs (baga nga sandals sa mga babaye).

Ang PDEA-7 nakadawat og impormasyon kabahin sa maong shipment gikan sa PDEA-National Capital Region ug gipanid-an nila kini hangtud sa pag-abot dinhi sa Sugbo. Nagdumili hinuon pagbutyag ang PDEA-7 sa pribadong cargo forwarder  nga maoy gipadad-an sa maong mga drugas nga mikooperar sa ilang operasyon. Sumala pa nga gikan pa lang sa pagbiyahe hangtud sa pag-abot sa maong package sa bodega sa maong forwarder company, gi-monitor na kini sa PDEA sa tuyo nga maaktohan ang consignee niini nga si Editha pag-claim niini sa opisina sa maong kompanya. Human i-claim ni Editha ug sa iyang anak ang package gidakop dayon ang duha kagahapon pasado alas-5 na sa hapon. “It all passed in the inspections in order to let Editha claim the package,” matud pa sa pamahayag sa PDEA-7. Nasuta sa gihimong  laboratory test sa nasakmit nga shabu nga dunay presensya sa metamphetamine ang maong mga pulbos, timailhan nga shabu kini.

Ang duha kusganong mihimakak sa pasangil kay matud pa sa inahan nga si Editha gisugo lang sila pag-claim sa maong kargamento. (/EIM)(BANAT NEWS)