Drainage projects sa Mandaue sugdan Lunes

CEBU, Philippines - Gitagad na sa Department of  Public Works and Highways (DPWH) ang dugay na kaayo nga problema sa pagbaha ug paglunop sa pipila ka karsada sa dakbayan sa Mandaue kun mobunok ang kusog nga uwan. Gigahinan og P83 milyones ang mao nga Drainage Projects nga gikatakda nga sugdan pagpatuman sa DPWH ugma’ng adlawa ug gibana-bana nga makompleto paghuman paglabay sa 300 ka adlaw.

Gipaabot nga ang mao nga proyekto makamugna usab og problema sa trapiko kay mogamay na man unya ang agianan sa mga sakyanan kun magkubkob na ang kontraktor sa DPWH sa lubngan nila og dagko nga imbornal.

Si Mandaue City Planning and Development Officer Florentino Nimor Jr. mitug-an nga ang kantidad nga gastohon alang sa daghang drainage projects gikan kini sa nasudnong kagamhanan nga gipaagi sa DPWH.

Kun sugdan na ang proyekto, ang maapektohan nga mga karsada mao ang dapit sa A.S. Fortuna eskena  M.C. Briones nga molahos ngadto  sa Banilad, dakbayan sa Sugbo kay ang matag  sidewalk niini maoy kubkubon ug lubngan og dagko nga imbornal.

Ang mao nga dapit kanunay nga makasinati og problema sa paglunop ug pagbaha kay kusog nga tubig gikan sa Barangay Cabangcalan ang mobaha anha sa karsada nga makabalda sa dagan sa mga sakyanan.

Matud ni Nimor nga ang mao nga proyekto sa DPWH-7 maoy ilang nakita nga sulbad sa kanunay nga pagbaha sa dalan A.S. Fortuna. Ang drainage improvement project mamidpid sa M.C. Briones ug molahos pa sa A.S Fortuna sa Barangay Guizo ug molagbas pa gayud sa dalan A.  Del Rosario paingon na sa Cebu International Convention Center (CICC) sa reclamation area sa Barangay Tipolo. Si Edwin Ermac nga maoy operation chief sa Traffic Enforcement Agency of Mandaue (TEAM) miingon nga nangandam na sila pinaagi sa paghimo og plano sa agianan sa mga sakyanan aron dili mosamot ang problema sa trapiko.

Matud ni Ermac nga adunay idestino nga mga traffic enforcer sa mga apektado nga karsada nga maoy mogiya sa mga drayber pagsubay sa dalan aron maminus-menos ang problema sa panaghuot sa mga sakyanan. Apil sa maapektohan mao ang mga PUJ ug mga pribado’ng sakyanan nga magagikan sa dakbayan sa Lapu-Lapu ug mga sakyanan gikan sa dakbayan sa Sugbo ug amihanang bahin sa probinsya.

Gitataw ni Ermac nga gihatagan nila og katungod ang mga drayber sa pagpili sa mga dalan nga ilang pagasubayon kun makita niini nga dili daghan ang mga mangagi nga sakyanan aron sa pagdali sa ilang pagbiyahe. Gituohan nga kun masinati ang grabe’ng problema sa kahuot sa mga sakyanan dili  ra ang mga trabahador ang maapektohan kun dili apil ang mga tinun-an nga malangay pag-abot sa ilang klase.  (BANAT NEWS)