Magtiayon nga usher sa masiao gisikop

CEBU, Philippines - Nagtingkagol sa bilanggoan ang magtiayon nga gituohang usher og illegal numbers game nga masiao nga nag-operate sa Barangay Bonbon, lungsod sa Aloguinsan.

Ang mga dinakpan mao sila si Venerando Menguito, 55, ug Elsa Menguito, 56, mga molupyo sa Barangay Bonbon. Nadakpan sila sa mga sakop sa Regional Intelligence Division (RID) diha nga gipalitan sila og numero sa nagpatuo nga sugarol og masiao.

Matud sa kapolisan nga dugay na nga gipanid-an ang magtiayon sa kalambigitan nila sa ilegal nga sugal. Diha nga nakumpirmar na nila, dali kini nga gironda sa mga polis ug naaktuhan mismo nga nagkatag ang mga gamit sa ilegal nga sugal didto sulod sa balay.

Nasakmit sa mga polis ang daghan nga tally sheets, P2,000 nga gituohang kita sa masiao ug uban pa nga illegal numbers game paraphernalia. Gikatakdang pasakaan og kasong kalapasan sa ilegal nga sugal ang managtiayon. Ang masiao mikatap gihapon sa kalungsoran tungod sa pagkuyanap sa mga tipsheets nga gigama dinhi sa dakbayan ug nakapatuo sa mga sugarol sa bukid nga aduna gihapo’y jai-alai. (BANAT NEWS)