CEBU, Philippines - Mibakwit ang mga tinun-an sa Sapangdaku Elementary School kagahapon sa buntag human misaka ang tubig sa Guadalupe River ug nabutang sa peligro ang mga bata sa eskuylahan tungod sa usa ka oras nga kusog nga pagbunok sa uwan.
Ang mga barangay tanod ug mga ginikanan daling miresponde sa mga tinun-an ug gidala sa mas luwas nga lugar.
Matud pa ni barangay kapitan Lorna Damalerio sa gipatawag nga emergency meeting sa Local School Board ug sa Department of Education kagahapon sa hapon, usa ka oras ang pagbunok sa uwan maong misaka ang level sa tubig sa sapa.
Si Mayor Michael Rama mimando nga temporaryong hunongon ang klase, apan nasayran nga gipadayon kini niana nang hapon human milurang ang tubig.
Kahinumduman nga niadtong 2007 ang tunghaan sa Sapangdaku nga kaniadto Baksan Elementary School gibahaan abot taga-liog human nga milapaw ang sapa.
Dugay na nilang gihangyo ang siyudad nga ma-relocate ang maong eskuylahan apan hangtud karon wala pa kini buhata.
Apan matud ni Atty. Jose Daluz III, ang executive assistant ni Rama nga dugay na gyod nangita og relocation site ang siyudad apan napakyas kini. (/EIM)(BANAT NEWS)