CEBU, Philippines - Nag-atubang karon og posibleng pagkabilanggo ang tulo ka mga senador human ang Office of the Ombudsman midayon na sa pagpasaka og kasong plunder batok kanila tungod sa kalambigitan sa "pork barrel" scam diha sa Sandiganbayan.
Ang mga gipangkiha mao sila si Senators Juan Ponce Enrile, Jose "Jinggoy" Estrada ug Ramon "Bong" Revilla, Jr. nga giingong nakitang nangawkaw sa panudlanan sa kaban sa katawhan kauban sa negosyanteng si Janet Lim Napoles isip co-conspirator.
Ang Philippine National Police daan nang mipahibalo nga naandam na ang prisohan alang sa maong mga elected officials. Ang upat gipasanginlang giingong nangawkaw sa Priority Development Assistance Funds (PDAF) gikan sa tuig 2006 hangtud sa 2010. Matud pa sa report sa Philstar.com, ang maong mga senador, si Napoles ug ang ilang mga alalay nga akusado "willfully, unlawfully, and criminally amass, accumulate and/or acquire ill-gotten wealth" pinaagi sa gihulagway sa Ombudsman nga "a combination or series of overt criminal acts."
Ang Ombudsman's Graft Investigation and Prosecution Office miingon nga si Revilla mibulsa og P224.51 milyones, si Estrada, gituohang nakabulsa usab og P183.79 milyones samtang si Enrile P172.83, kining tanan giingong mga kickbacks sa mga bogus sa proyekto nga giingong gipaagi sa bogus nga mga non-governmental organizations ni Napoles. Lakip sa gikasohan mao ang chief-of-staffs sa maong senador. (Philstar.Com/EIM)