CEBU, Philippines - Niulbo ang tensiyon sa sesyon sa konseho sa dakbayan sa Talisay niadtong Martes human nagkalalis silang Konsehal Socrates Fernandez ug Sangguniang Panlungsod Secretary Emigdio Enjambre, Jr.
Ang bangi nahitabo dihang si Fernandez mihangyo kang Enjambre nga ihatag og sayo ang kopya sa iyang resolusyon nga naaprobahan na.
Sa wala pa ang sesyon, si Enjambre mipahibawo na kang Bise Mayor Romeo Villarante nga dili sila makahatag og sayo sa kopya sa tanang resolusyon nga naaprobahan tungod kay duna sila’y tulo ka adlaw nga seminar sa Kapitolyo.
Sa wala pa mahuman ang sesyon, si Majority Floor Leader Richard Francis Aznar mihangyo kang Enjambre nga ihatag og sayo ang mga kopya sa resolusyon nga naaprobahan na apan gibalibaran sa samang rason.
Human sa sesyon si Enjambre miduol kang Fernandez ug misulti nga wala sa House Rules ang paghatag og sayo sa kopya sa resolusyon.
Giingong mikuha si Enjambre og kopya sa House Rules ug giitsa ngadto sa atubangan ni Fernandez.
Si Villarante, mga staff ni Enjambre ug ang ubang konsehal daling miuwang ni Enjambre ug Fernandez.
Hinuon human sa hitabo si Enjambre miadto sa buhatan ni Fernandez ug nangayo og pasaylo. (BANAT NEWS)